ആരോപണങ്ങളുടെ ചുരുളഴിയുമ്പോള്‍ : യുക്തി മരവിച്ച വിമര്‍ശകര്‍ !!

ഗ്രീക്ക് ഭ്രൂണശാസ്ത്രം നബി (സ)ക്ക് പഠിക്കാൻ ഒരു മാർഗ്ഗവുമില്ലായിരുന്നു എന്ന് വ്യക്തമായ തെളിവുകളുടെ അടിസ്ഥാനത്തിൽ നാം മനസിലാക്കി. മുഹമ്മദ്‌ നബി (സ)ക്ക് ഖുറാനിലെ ഭ്രൂണശാസ്ത്രസംബന്ധിയായ വിവരങ്ങൾ അരിസ്ടോടിൽന്റെയും , ഗാലന്റേയും വിജ്ഞാന ശേഖരങ്ങളിൽ നിന്ന് മോഷ്ട്ടിച്ചതാണ് എന്ന് വിമര്ഷകരുടെ ആരോപണം കേവലം ഒരു ആരോപണം മാത്രമായി അവശേഷിക്കുന്നു. ഇനി ഗാലനും അരിസ്ടോടിലും പറഞ്ഞത് തന്നെയാണോ ഖുറാനും പറഞ്ഞത്? അല്ല എന്നുണ്ടെങ്കിൽ ഈയൊരാരൊപണത്തിന്റെ അടിത്തറ തന്നെ നഷ്ട്ടപ്പെട്ടില്ലേ? അത്തരമൊരു പരിശോധനയാണ് ഇനി നാം നടത്താൻ പോകുന്നത്.

ഖുറാനും അരിസ്റ്റൊടിലും:

അരിസ്റ്റൊടിലിന്റെ വീക്ഷണം തന്നെയാണോ ഖുർആനിനും? നമുക്ക് പരിശോധിക്കാം.

* പുരുഷബീജമാണ് മനുഷ്യ ജനനത്തിനു കാരണമെന്ന് അരിസ്റ്റൊടിൽ വിശ്വസിച്ചത്. ബീജം സ്ത്രീയുടെ ആർത്തവരക്തവുമായി കൂടിച്ചേർന്നു കട്ട പിടിച്ചിട്ടാണ് ഭ്രൂണം രൂപം കൊള്ളുന്നത് എന്നാണ് അരിസ്റ്റൊടിൽ "On the Generation of Animals" എന്ന തന്റെ പുസ്തകത്തില രേഖപ്പെടുത്തിയത് !! ഇത് ഖുർആനിക വീക്ഷണത്തിനും ആധുനിക ഭ്രൂണശാസ്ത്രത്തിനും തീർത്തും എതിരാണ്‌.

* ഖുർആൻ ഉപയോഗിച്ച "നുത്വുഫ" എന്ന പദം കൊണ്ടുദ്ദേശിക്കുന്നത് സ്ത്രീപുരുഷ ബീജങ്ങളുടെ സമ്മിശ്രമാണ്, അല്ലാതെ പുരുഷ ബീജമല്ല. അതിനാൽ തന്നെ അരിസ്റ്റൊടിലും ഖുർആനും പറഞ്ഞത് തീർത്തും വിരുദ്ദമായ കാര്യങ്ങളാണത്രേ മാത്രമല്ല വിവിധ പ്രവാചക വചനങ്ങളിൽ നിന്ന് സ്ത്രീപുരുഷ സ്രവങ്ങൾക്ക് - രണ്ടിനും- കുഞ്ഞിന്റെ ജനനത്തിൽ സ്ഥാനമുണ്ട് എന്ന് വ്യക്തമാകുന്നു. അതിനാൽ തന്നെ ഖുർആനിക വീക്ഷണം തെളിയിക്കപ്പെട്ടതും അരിസ്റ്റൊടിലിന്റെ വീക്ഷണം ശാസ്ത്രം ചവറ്റുകുട്ടയിലേക്കെറിഞ്ഞതുമാണ്.

* പുരുഷഭ്രൂണം ഗര്‍ഭാശയത്തിന്റെ ഇടതുഭാഗത്തും പെണ്ഭ്രൂണം ഗർഭാശയത്തിന്റെ വലതു ഭാഗത്തുമാണ് രൂപം കൊള്ളുക എന്നാണു അരിസ്റ്റൊട്ടിൽ ധരിച്ചത്- ഖുർആനിൽ ഇത്തരമൊരു പരാമർശമേയില്ല. ഇത് ശാസ്ത്രവിരുദ്ദവുമാണ്.

* അരിസ്റ്റൊടിലിന്റെ വാദപ്രകാരം ശരീരത്തിന്റെ അരക്ക് കീഴെയുള്ള ഭാഗം മേൽ ഭാഗം രൂപം കൊണ്ടതിനുശേഷം അതിൽ നിന്നുണ്ടാവുന്നതാണ്. ഇത്തരമൊരു പരാമർശം ഖുർആനിലില്ല- മാത്രമല്ല, ഇത് ശാസ്ത്രവിരുദ്ദമാണ്.

* "അസ്ഥികൾ രൂപപ്പെട്ടതിനു ശേഷം അവ മാംസത്താൽ പോതിയപ്പെടും" എന്നൊരു പരാമർശം അരിസ്റ്റൊട്ടിൽ നടത്തുന്നുണ്ട്. ഇത് " അസ്ഥികളെ മാംസത്താൽ പൊതിഞ്ഞു" എന്ന ഖുർആനിക പരാമർശവുമായി സാദ്രിശ്യം പുലർത്തുന്നതിനാൽ ഈ ആശയം മുഹമ്മദ്‌ നബി(സ) അരിസ്റ്റൊട്ടിലിൽ നിന്ന് മോഷ്ട്ടിച്ചതാണ് എന്ന് വിമർശകർ ആരോപിക്കുന്നു.
എന്നാൽ രസകരമായ ഒരു കാര്യം ഈ ആരോപണം മുഹമ്മദ്‌ നബി (സ) അരിസ്റ്റൊടിലിന്റെ വീക്ഷണങ്ങൾ മോഷ്ട്ടിചിട്ടില്ല എന്നാണു തെളിയിക്കുന്നത്. ഉദാഹരണത്തിന് എങ്ങനെയാണ് മുഹമ്മദ്‌ നബി(സ)ക്ക് ചില കാര്യങ്ങൾ (ശരിയായവ) സ്വീകരിക്കാനും തെറ്റായവ തള്ളിക്കളയാനും കഴിയുന്നത്. അരിസ്റ്റൊടിലിന്റെ മുൻപത്തെ രണ്ടു വാദങ്ങൾ മുഹമ്മദ്‌ നബി(സ) സ്വീകരിച്ചില്ലല്ലോ അവ ശാസ്ത്രത്തിനു വിരുദ്ദമാണ്. മുഹമ്മദ്‌ നബി(സ) പകർത്തിയെഴുതിയതാണെങ്കിൽ ഇതെങ്ങനെ സംഭവിച്ചു ? മാത്രമല്ല അരിസ്റ്റൊടിലിന്റെ ഗ്രന്ഥങ്ങളിൽ പരാമർശിക്കാത്ത എന്നാൽ ശാസ്‌ത്രീയ സത്യങ്ങളുമായി പാരസ്പര്യം പുലർത്തുന്ന പല വീക്ഷണങ്ങളും ഖുർആൻ പറയുന്നുണ്ടുതാനും. ഇതിൽ നിന്ന് എത്താൻ കഴിയുന്ന യുക്തിപരമായ ഒരു കാര്യമേയുള്ളൂ . ഖുർആൻ അരിസ്റ്റൊടിലിന്റെ വാദങ്ങളെ ഒരിക്കലും പകർത്തിയിട്ടില്ല എന്ന് തന്നെ!