ഒരു കല്ല്‌ വളര്‍ന്ന കഥ....

ഞാനും ഉപ്പയും കോട്ടക്കലില്‍ നിന്ന് പാലക്കാട്ടേക്ക് പോകുന്ന വഴി മണ്ണാര്‍ക്കാട് എത്താറായപ്പോള്‍ ആണ് ഡ്രൈവര്‍ സുധാകരേട്ടന്‍ പറഞ്ഞത്‌,"ഇവിടെ നിങ്ങളുടെ സമുദായത്തിന്റെ ഒരു പുണ്യ സ്ഥലമുണ്ട്".. സുധേട്ടന്‍ പറഞ്ഞത് കേട്ടപ്പോള്‍ അതൊന്നു കണ്ടിട്ട് തന്നെ കാര്യം എന്ന് തോന്നി.സ്ഥലമെത്തിയപ്പോള്‍ മൂപ്പര്‍ വണ്ടി സൈടാക്കി..റോഡിന്റെ എതിര്‍വശത്തെ കെട്ടിടത്തില്‍ "നാട്ടുകല്‍ വലിയുല്ലാഹി മഖാം" എന്നെഴുതി വെച്ചിരിക്കുന്നു..പോകുന്ന വാഹനങ്ങളില്‍ മിക്കതും വണ്ടി നിര്‍ത്തി സംഭാവന നല്‍കിയേ പോകുന്നുള്ളൂ.. എന്നാല്‍ പിന്നെ കണ്ടിട്ട് തന്നെ കാര്യം എന്നായി..

റോഡു ക്രോസ് ചെയ്തു അപ്പുറത്ത് കടന്നു..കെട്ടിടത്തിനു മുന്‍പിലായി ഒരു വലിയ പാറക്കല്ല് നീണ്ടു നിവര്‍ന്നു കിടക്കുന്നു. അതിന്മേല്‍ "ഇവിടെ ചവിട്ടരുത്" എന്ന് എഴുതി വെച്ചിട്ടുണ്ട്..ഉള്ളിലോട്ട് കടന്നു. ഒരു ശവകുടീരം സിമന്റ് ഇട്ടു തേച്ചു പച്ച പെയിന്റ് അടിച്ചു വെച്ചിരിക്കുന്നു. അടുത്ത് തന്നെ വലിയൊരു പാറക്കല്ല് കുത്തനെ നിവര്‍ന്നു നില്‍ക്കുന്നു. നിലവിളക്ക്, ചന്ദനത്തിരി എന്നിത്യാദി സംഭവങ്ങള്‍ക്ക് ഒരു പഞ്ഞവുമില്ല(ഒരു പാട് ട്യൂബ് ലൈറ്റ്‌ ഉള്ളിടത് എന്തിനാണ് ഇത്തിരിപ്പോന്ന നിലവിളക്ക് വെക്കുന്നത് എന്നത് ഇത് വരെ ഉത്തര കിട്ടാത്ത ഒരു ചോദ്യമാണ്!).

സംഭവം തിരിയാതെ നില്‍കുന്ന ഞങ്ങള്‍ മാപ്പിളമാരുടെ നിസ്സയാവസ്ഥ മനസ്സിലാക്കി ഹൈന്ദവ വിശ്വാസിയായ സുധേട്ടന്‍ കാര്യം വിശദമാക്കി തന്നു," പേരോ ഊരോ അറിയാത്ത ഒരാളുടെ ശവകുടീരമാണിത്. മരിച്ചു ശവമടക്കിയപ്പോള്‍ കുത്തിവെച്ച മീസാന്‍ കല്ല്‌(മീസാന്‍ കല്ല്‌- ഒരിടത്ത് ഒരു ഖബര്‍(ശവകുടീരം) ഉണ്ട് എന്ന് സൂചിപ്പിക്കാന്‍ വെക്കുന്ന കല്ല്‌) അദ്ഭുതകരമായി വളരാന്‍ തുടങ്ങി! ബഷീറിന്റെ മൂക്കനെ പോലെ ഇങ്ങേരുടെ മീസാന്‍ കല്ല്‌ അനുദിനം വളരുകയാണ്! ഒടുവില്‍ ആ വഴി വന്ന ഒരു മഹാദിവ്യനോട് നാട്ടുകാര്‍ പരാതി പറഞ്ഞു. ദിവ്യന്‍ കയ്യിലെ വടിയെടുത്ത് "മതി കല്ലേ വളര്‍ന്നത്‌" എന്നും പറഞ്ഞു ഒറ്റയടി. കല്ല്‌ രണ്ടു കഷണമായി പിളര്‍ന്നു-ഒരു പീസ്‌ റോഡ്‌ സൈഡില്‍ വീണു കിടക്കുന്നു-മറ്റേ പീസ്‌ കബരിന്റെ അടുത്ത് തന്നെ നീണ്ടു നിവര്‍ന്നു നില്‍ക്കുന്നു. അതോട് കൂടി കല്ലിന്റെ വളര്‍ച്ചയും നിന്നു!"

ഏകദൈവാരാധനയില്‍ അധിഷ്ടിതമായ ഒരു മതത്തില്‍ ഇമ്മാതിരി കള്ളക്കഥകളും വ്യാജ ദിവ്യന്മാരും വ്യാപകമാകുന്നു..മരണപ്പെട്ട മനുഷ്യരെ വിളിച്ചു പ്രാര്‍ഥിചിട്ടോ, അവരോട് ആവലാതികള്‍ ബോധിപ്പിചിട്ടോ ഒരു കാര്യവുമില്ല എന്ന് മനസ്സിലാക്കാനുള്ള കോമണ്‍സെന്‍സ്‌ പോലുമില്ലാത്ത ആളുകള്‍! അവരോടു ഇത്രയേ പറയാനുള്ളൂ..ഏറ്റവും മിനിമം ശോകേസില്‍ ഭദ്രമായി വെച്ചിരിക്കുന്ന ഖുര്‍ആന്‍ എടുത്തു തുറന്നു എന്നും മിനിമം പതിനേഴു തവണ നിസ്കാരത്തില്‍ ഓതുന്ന ഫാത്തിഹ എന്ന ഒന്നാമത്തെ അധ്യായത്തിലെ അഞ്ചാം വചനത്തിന്റെ അര്‍ഥം പഠിക്കുക...
إِيَّاكَ نَعْبُدُ وَإِيَّاكَ نَسْتَعِينُ
"നിന്നെ മാത്രം ഞങ്ങള്‍ ആരാധിക്കുന്നു. നിന്നോട് മാത്രം ഞങ്ങള്‍ സഹായം തേടുന്നു."

മാപ്പിളമാരേ, എന്ട്രന്സിനു റാങ്ക് നേടുന്ന ആ തലമണ്ട ഉപയോഗിച്ച് ഈ ചെറിയ കാര്യമെന്കിലും ഒന്ന് ചിന്തിക്കൂ...പ്ലീസ്‌....